ភ្នំពេញ៖ រដ្ឋលេខាធិការក្រសួងសង្គមកិច្ច និងជាអគ្គលេខាធិការក្រុមប្រឹក្សាសកម្មភាពជនពិការ លោក ឯម ច័ន្ទមករា បានស្នើទៅកាន់តំណាងការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា លោកស្រី រួអេដា អិលហាច ក្នុងការជួយបណ្ដុះបណ្ដាលបង្កើនការយល់ដឹងរបស់មន្ត្រីនគរបាលយុត្តិធម៌កម្ពុជាពីសន្និសញ្ញាអន្តរជាតិស្ដីសិទ្ធិជនមានពិការភាព UNCRPD។

ការស្នើឡើងនេះធ្វើឡើងក្នុងជំនួបរវាងលោករដ្ឋលេខាធិការ និងជាអគ្គលេខាធិការក្រុមប្រឹក្សាសកម្មភាពជនពិការ ជាមួយលោកស្រី រួអេដា អិលហាច នាថ្ងៃទី២៣ ខែមករា ឆ្នាំ២០២៤ នៅអគ្គលេខាដ្ឋានក្រុមប្រឹក្សាសកម្មភាពជនពិការ។

លោក ឯម ច័ន្ទមករា បានលើកឡើងថាការយល់ដឹងរបស់មន្ត្រីនគរបាលយុត្តិធម៌លើអនុសញ្ញាស្តីពីសិទ្ធិជនមានពិការភាពមានសារៈសំខាន់ក្នុងការជួយលើកស្ទួយនូវសិទ្ធិរបស់ជនមានពិការភាព។

លោកថ្លែងថា៖ «ការចូលរួមចំណែកណាមួយរបស់ UNOHCHR នឹងជួយឱ្យផែនការយុទ្ធសាស្រ្តជាតិស្តីពីសកម្មភាពនេះកាន់តែមានធាតុចូលច្រើនទៀត និងកាន់តែមានប្រសិទ្ធិភាពសម្រាប់យកទៅអនុវត្ត ហើយការចូលរួមជួយនេះគឺអាចចូលរួមក្នុងអំឡុងពេលដែលយើងរៀបចំធ្វើសេចក្តីព្រៀង (ច្បាប់ស្តីពីជនមានពិការភាព) ហើយបន្តទៅគឺការដាក់ចេញ និងបន្តទៅការឱ្យមានការផ្សព្វផ្សាយឱ្យមានការអនុវត្តផែនការនេះ»។

លោកស្រី រួអេដា អិលហាច បានយល់ស្របនឹងការលើកឡើងនេះ និងថាការិយាល័យឧត្តមស្នងការអង្គការសហប្រជាជាតិ នឹងគាំទ្រកិច្ចសហការរវាងក្រុមប្រឹក្សាសកម្មភាពជនពិការ និងអង្គការតំណាងជនមានពិការភាពពេញ ១ឆ្នាំ និងរៀបចំសៀវភៅណែនាំអំពី អនុសញ្ញាស្តីពីសិទ្ធិជនពិការ ដើម្បីប្រើប្រាស់ក្នុងការលើកកម្ពស់ចំណេះដឹង និងកសាងសមត្ថភាពដល់ក្រសួងពាក់ព័ន្ធ និងក.ស.ជ ថ្នាក់ខេត្ត។

ជាមួយគ្មានេះ UNOHCHR ក៏គាំទ្រក្រុមប្រឹក្សាសកម្មភាពជនពិការ ផ្សព្វផ្សាយសៀវភៅណែនាំទៅដល់ថ្នាក់ខេត្តតាមរយៈរបៀបបង្រៀនបែបគ្រូបង្គោល។

តំណាង UN ក៏គាំទ្រក្រុមប្រឹក្សាសកម្មភាពជនពិការ រៀបចំផែនការផ្សព្វផ្សាយវីដេអូ «សិទ្ធិរបស់ខ្ញុំ ជីវិតរបស់ខ្ញុំ» ដើម្បីលើកកម្ពស់សិទ្ធិជនមានពិការភាព និងធ្វើឱ្យមានការផ្លាស់ប្តូរពីការគិតនៅក្នុងសង្គម។

អគ្គលេខាធិការក្រុមប្រឹក្សាសកម្មភាពជនពិការ លោក ឯម ច័ន្ទមករា បានលើកឡើងបន្ថែមដល់តំណាង UNOHCHR ឱ្យដឹងថា សកម្មភាពបន្តលើកិច្ចសហប្រតិបត្តិការវាងលេខាធិការក្រុមប្រឹក្សាសកម្មភាពជនពិការនឹងបន្តផ្តល់វគ្គបណ្តុះបណ្តាលទៅលើចៅក្រម ព្រះរាជអាជ្ញាក៏ដូចជាអ្នកពាក់ព័ន្ធផ្លូវច្បាប់លើកិច្ចការងារអនុសញ្ញានឹងមានល្អប្រសើរឡើង ខណៈលោកបានរាយការណ៍ជូនរដ្ឋមន្រ្តីក្រសួងយុត្តិធម៌រួចរាល់ ពីបទពិសោធន៍វគ្គបណ្តុះបណ្តាលកន្លងមក ដោយរដ្ឋមន្ត្រីយុត្តិធម៌សន្យាថានឹងផ្តល់ការយកចិត្តទុកដាក់ទៅលើវគ្គបណ្តុះបណ្តាលនេះជាមួយចៅក្រម ព្រះរាជអាជ្ញាជាបន្តបន្ទាប់ទៀត៕